NATO Birgə Qüvvələr Təlim Mərkəzinin (JFTC) yeni komandanı, general-mayor Boqdan Ritserski Gürcüstanda işgüzar səfərdə olub. Məlumatı Müdafiə Nazirliyi yayıb.

Agentliyin məlumatına görə, səfər çərçivəsində Boqdan Ritserski Müdafiə Qüvvələri komandanının müavini general-mayor Zaza Çxaidze və təlim və hərbi təhsil komandiri polkovnik Zurab Xviçia ilə görüş keçirib.

“Tərəflər Gürcüstan Müdafiə Qüvvələrinin imkanları, hazırkı islahatlar və gələcək əməkdaşlıq perspektivləri barədə danışıblar.

Krtsanisdə NATO-Gürcüstan Birgə Təlim və Qiymətləndirmə Mərkəzinə (JTEC) səfəri zamanı mərkəzin komandiri polkovnik Davit Qaqua qonaqları mərkəzin məqsəd və vəzifələri ilə tanış edib. İclasda bu il Gürcüstanda keçirilməsi planlaşdırılan “NATO-Gürcüstan 2025” təlimi müzakirə olunub. Təlim mərkəzləri arasında çoxillik səmərəli əməkdaşlıq və JFTC-nin JTEC-in inkişaf prosesində göstərdiyi dəstək qeyd edilib.

NATO-Gürcüstan Birgə Təlim və Qiymətləndirmə Mərkəzi (JTEC) 2017-ci ildə Polşadakı NATO Birgə Qüvvələr Təlim Mərkəzi (JFTC) ilə əməkdaşlığa başlayıb. 2020-ci ildə onlar arasında tərəfdaşlıq müqaviləsi imzalanıb”. – Müdafiə Nazirliyinin məlumatında qeyd olunur.