Gürcüstan Milli Bankının prezidenti səlahiyyətlərinin icraçısı Natia Turnava Gürcüstanın Biznes Assosiasiyasının təşkil etdiyi konfransda iştirak edib.

“Gürcüstan iqtisadiyyatına ümumi baxış: makroiqtisadi və sektoral perspektivlər” adlı panel müzakirəsində çıxış edən Natia Turnava ölkənin sağlam makroiqtisadi mühitinə və artan iqtisadi potensiala diqqət çəkib. O, investisiyaları iqtisadi artımın əsas hərəkətverici qüvvəsi adlandırıb.

“İnflyasiya ötən ilin mart ayından hədəf səviyyəsindən aşağı olub, son 5 ayda isə 1%-dən aşağı olub. Bu, iqtisadi artımın məhsuldarlığın artımı hesabına baş verdiyini göstərir. Qeyd etmək lazımdır ki, bütövlükdə ölkənin iqtisadi potensialı artıb, yüksək iqtisadi artım fonunda inflyasiyanın artımını neytrallaşdıran amil olan məhsuldar sənaye sahələrinin inkişafı müşahidə olunub, bu, həqiqətən də yaxşı inkişafdır”-deyə Natia Turnava qeyd edib.

O bildirib ki, bu, pul siyasətinin yumşaldılma tempinin bir qədər də cəsarətli olması lazım olduğunu düşünməyə imkan verir.

“Eyni zamanda, əsas çağırış pul siyasətinin zəruri çevikliyi olaraq qalır. O zaman Milli Bank digər ölkələrlə müqayisədə daha sürətlə pul siyasətini sərtləşdirməyə başladı və məhz bu səbəbdən digərlərinə nisbətən kifayət qədər ehtiyatlı addımlarla olsa da, biz pul siyasətini yumşaldırıq və faiz dərəcəsini daha tez aşağı salırıq. Nəzərə alsaq ki, iqtisadi artım əsasən məhsuldarlıq hesabına kifayət qədər yüksəkdir, inflyasiya isə kifayət qədər aşağı səviyyədədir, bu amillər pul siyasətinin yumşaldılma tempinin bir qədər də cəsarətli olması lazım olduğunu düşünməyə imkan verir. Əlbəttə, kifayət qədər ehtiyatlı, çünki biz mühafizəkar olmalıyıq, bütün potensial riskləri nəzərə almalıyıq” – Natia Turnava bildirib.

Natia Turnava çıxışında onu da vurğulayıb ki, Milli Bankın, hökumətin iqtisadi komandasının və müvafiq profilli nazirliklərin birgə antiinflyasiya siyasətinin nəticələri və onların həyata keçirdikləri əlaqələndirilmiş tədbirlər göz qabağındadır.

“İnflyasiyanın azaldılması və həyata keçirilən antiinflyasiya siyasəti iqtisadi siyasətdə koordinasiyanın bizə yaxşı nəticələr verdiyinə yaxşı nümunədir. Hökumətin həyata keçirdiyi antiinflyasiya tədbirləri, o cümlədən müxtəlif sektorlarda rəqabətin gücləndirilməsi, bizim tərəfimizdən isə pul siyasətinin sərtləşdirilməsi bizə birlikdə çox yaxşı nəticə verdi” – deyə Turnava bildirib.

Natia Turnava həmçinin səylərinə və əməkdaşlığa görə Gürcüstanın Biznes Assosiasiyasına, maliyyə sektoruna və kommersiya banklarına təşəkkür edib.

Məlumatı Milli Bankın mətbuat xidməti yayır.