“MyWay Airlines”ın baş direktoru Rati Bakuradze onların şirkətinin 13 əməkdaşının Sudanda olduğunu və bu mərhələdə təhlükəsiz yerdə olduqlarını açıqlayır.

Bakuradze aviaşirkətin öz əməkdaşlarını təxliyə etmək üçün Sudanda vəziyyətin sabitləşməsini gözlədiyini bildirib.

“13 əməkdaşımız Sudandadır. Son məlumatlara görə, onlar təhlükəsiz yerdədirlər. Episentrdən bir qədər uzaqdadırlar, təxminən üç günlük su ehtiyatı və bir günlük ərzaq ehtiyatları var. Bununla belə, biz sudanlı tərəfdaşlarımızla əməkdaşlıq edirik və ən qısa zamanda ərzaq və suyu çatdırmağa çalışacağıq. Bu mərhələdə elektrik enerjisi var, baş verən inqilabi ssenarilərə görə yollar bağlıdır və nəqliyyatın hərəkəti məhdudlaşdırılıb. Hamıya pəncərələrdən uzaq durmağa dair xəbərdarlıq etmişik, çünki dünən kiçik hadisə baş verib, onların yaşayış yerinin mətbəx hissəsinə güllə dəyib, lakin tələfat olmayıb, çünki yataq otaqları və yaşayış sahəsi binanın digər tərəfindədir. Heyətimizi çıxarmaq üçün vəziyyətin sabitləşməsini gözləyirik. Bu mərhələdə Gürcüstanın Türkiyədəki konsulu ilə əlaqə saxlayırıq və məlumat mübadiləsi aparırıq. Yaşıl dəhlizdən danışmaq bir qədər tezdir, çünki orada nəzarət etməyin çətin olduğu bir neçə qüvvə var” – deyə Rati Bakuradze açıqlayıb.

Sudanda ölkə ordusu ilə hərbiləşdirilmiş “Çevik Dəstək Qüvvələri” qrupunun döyüşçüləri arasında toqquşmalar davam edir. Beynəlxalq medianın yazdığı kimi son məlumatlara görə, 100-dən artıq insan həlak olub, 600-dən çox isə yaralı var.