Gürcüstan parlamentinin 46 deputatı parlamentin spikeri Şalva Papuaşviliyə müraciət edərək ondan deputatların prezident Saakaşvilini ziyarət etməsini məhdudlaşdırmaq üçün səlahiyyətlərindən sui-istifadə etməsinin səbəbini izah etməyi tələb edir-bu barədə “Milli Hərəkat”ın üzvləri parlamentdə bəyanat veriblər.

“Milli Hərəkat”ın üzvü Tina Bokuçavanın qeyd etdiyi kimi, Şalva Papuaşvili artıq bir neçə aydır heç bir deputata, Gürcüstan parlamentinin heç bir üzvünə Mixeil Saakaşviliyə baş çəkməyə icazə vermir.

“Dünən yayılan kadrlar, prinsipcə, niyə sualına cavab verdi, çünki prezident Saakaşvilinin səhhəti son dərəcə ağırdır və onlar həqiqəti gizlətmək, ölkənin üçüncü prezidentini təcriddə saxlamaq istəyirlər. Bu səbəbdən biz tələb edirik ki, bütün dünyanın onun səhhətinin vəziyyəti ilə bağlı həqiqətləri bilməsi üçün daima Mixeil Saakaşvilini ziyarət etməyə çalışan Gürcüstan parlamentinin üzvləri, eləcə də avropalı parlamentarilər və Ukraynanın xalq müdafiəçisinə dərhal icazə verilsin”- deyə Tina Bokuçava açıqlayıb.

Gürcüstan parlamentinin sədrinə müraciəti “Milli Hərəkat”ın üzvləri və digər müxalifət fraksiyalarından olan bir neçə deputat imzalayır.