Almaniyanın paytaxtı Berlində Milli Şərab Agentliyinin dəstəyi ilə Şərab İnstitutunda – Deutsche Wein und Sommelierschule-də gürcü şərabının təqdimat-seminarı keçirilib.

Almaniya Sommelier Assosiasiyasının prezidenti İvon Heistermanın sədrliyi ilə keçirilən tədbirdə beynəlxalq marketinq mütəxəssisləri, tələbələr və şərab həvəskarları iştirak ediblər.

Təqdim olunan təqdimatda gürcü şərabçılıq mədəniyyətinin inkişaf tarixi, şərab sənayesinin müasir vəziyyəti, həmçinin Gürcüstan şərab marketinq kampaniyalarının strategiyası və əsas məqsədləri yer alıb.

Berlində gürcü şərabının təqdimatı Almaniyanın marketinq şirkəti ff.k Public Relations, Milli Şərab Agentliyinin podratçısı və Deutsche Wein und Sommelierschule şərab institutunun iştirakı ilə keçirilib.

Avropanın ən böyük şərab idxalçısı olan Almaniya 2020-ci ildən gürcü şərabının strateji bazarları siyahısına əlavə edilib və davamlı olaraq ilk on ixrac ölkəsi sırasında yer alıb. Bu ilin altı ayında Gürcüstandan Almaniyaya 674 min litr şərab ixrac edilib, ötən ilin müvafiq dövrü ilə müqayisədə artım 32% təşkil edib.