Mixeil Ğavelaşvili – Biz Gürcüstan uğrunda canını fəda etmiş hər bir insanı xatırlayırıq, onların xatirəsi qarşısında borcumuz sülhü qorumaq və ölkəmizin mütləq birləşəcəyinə olan inamımızı itirməməkdir

Gürcüstan Prezidenti Mixeil Ğavelaşvili Suxuminin süqutu günündə Gürcüstanın birliyi uğrunda həlak olmuş qəhrəmanların memorialını əklillə bəzəyib.

Memorialın önündə Gürcüstan Prezidenti ilə birlikdə Baş nazir, Parlamentin sədri, Tbilisi meri, icraedici və qanunverici hakimiyyətin nümayəndələri, həmçinin müharibədə həlak olanların ailə üzvləri iştirak ediblər.

Mixeil Ğavelaşvili Gürcüstanın birliyi və azadlığı uğrunda mübarizədə canlarını qurban verənlərin xatirəsini ehtiramla yad edib.

“Biz Gürcüstan uğrunda canını fəda etmiş hər bir insanı xatırlayırıq, onların xatirəsi qarşısında borcumuz sülhü qorumaq və ölkəmizin mütləq birləşəcəyinə olan inamımızı itirməməkdir”, – deyə Mixeil Ğavelaşvili bildirib.

Gürcüstan Prezidentinin bildirdiyinə görə, bu günün xatirəsi ölkənin üzərinə sülhsevər və ardıcıl dövlət siyasəti ilə Gürcüstanın bütövlüyünə doğru irəliləməyə davam etmək, sülhü qoruyub saxlamaq və dövləti gücləndirmək məsuliyyəti qoyur.