Kursk vilayətində gedən döyüşlərlə əlaqədar Kiyevdə ilk şərhi veriblər.

Ukraynanın Prezident Ofisinin rəhbəri Mixail Podoliakın dediyi kimi, istənilən eskalasiyanın əsas mənbəyi Rusiyanın təcavüzüdür və müvafiq olaraq, məsuliyyət Vladimir Putinin üzərinə düşür.

“Rusiyanın özünü məhv etmə konsepsiyasının müəllifi Putinin özüdür” – Podoliak bildirir.

O bildirir ki, Rusiyada, məhdudlaşdırıcı hüquqi normaların onlara şamil edilmədiyini, bu səbəblə cəzasız olaraq qonşu dövlətlərə hücum edə biləcəklərini və riyakarlıqla öz ərazilərinin toxunulmazlığını tələb edə biləcəklərini hesab edirlər, lakin müharibədə təcavüzkar əkdiyini biçir.

Rusiya Müdafiə Nazirliyi Kurskda davam edən hərbi əməliyyatlar haqda məlumatı yeniləyib.

Qurumda, rus hərbçilərin ukraynalıların irəliləməsini dayandırdıqlarını bildirirlər. Həmçinin, Moskvada Rusiya ərazisinə daxil olan hərbçilərə qarşı aviasiyadan istifadə etdiklərini açıqlayıblar.

Ukrayna mediası Kurskda gedən döyüşlər zamanı azı 32 rus hərbçinin təslim olduğunu yazır.

Rusiyanın hərbi bloqerlərinin məlumatına görə isə, ukraynalı hərbçilər Kursk vilayəti daxilində irəliləməyə davam edirlər.

Ukraynalı əsgərlər 24 saat ərzində rusların Kurskda qurduğu iki müdafiə xəttini yarıb keçə biliblər.