Məsud Fezeşkian – İran ABŞ və İsrailə müqavimət göstərir, çünki onlar bizi əzmək istəyirlər, biz isə zülmə və tabeçiliyə boyun əyməkdən imtina edirik, onlar buna yalnız xəyal edə bilərlər

İran ABŞ və İsrailə müqavimət göstərir, çünki onlar bizi əzmək istəyirlər, biz isə zülmə və tabeçiliyə boyun əyməkdən imtina edirik, – bu barədə İran prezidenti Məsud Fezeşkian bildirib.

Fezeşkianın sözlərinə görə, onlar “İranı terrorizmdə ittiham edən eyni şeytanlardır”.

“Bizik terrorçu, yoxsa bir göz qırpımında, sırf qabaqcıl texnologiyalarınız var deyə 168 günahsız uşağı qətlə yetirən sizlər? Bizik terrorçu, yoxsa universitetləri, alimləri və insanları bombalayıb məhv edən sizlər? Əgər onlar müharibə adamlarıdırsa, o zaman döyüş meydanında vuruşmalıdırlar. Onların xalqın infrastrukturuna, çörəyinə və dolanışıq vasitələrinə nə aidiyyəti var — niyə onları məhv edirlər? Əgər onlar insandırılarsa, niyə insanların suya, qidaya, çörəyə və kommunikasiyalara çıxışını məhdudlaşdırırlar? Ona görə ki, İran xalqını zülmlə təslim olmağa məcbur edə bilmirlər. Onlar qıtlıq yaratmaqla və kommunikasiyaları kəsməklə insanları təslim olmağa vadar etmək istəyirlər, lakin İran xalqı təslim olmayacaq. Bu, bizim insani və dini baxışlarımız əsasında gəldiyimiz qənaətdir. Biz inanırıq ki, insanıq və inanırıq ki, bu dünyada yaşayan hər bir insanın bərabər hüquqları var — nə az, nə çox”, – deyə Fezeşkian qeyd edib.

Onun sözlərinə görə, Birləşmiş Ştatlar İranın müstəqil qalmasını istəmir.

“O (ABŞ) xalqımıza xidmət etməyimizə mane olmaq üçün əlindən gələni edir, sonra isə onlara deyir: „Görürsünüz? Onlar bunu edə bilmirlər, yalan danışırlar“. Məhz bu cür öz bədxah məqsədlərini ölkəmizə qəbul etdirmək (sırımaq) istəyirlər. Bunda başqa heç nə yoxdur. İnqilabımız qalib gələndən bəri onlar cəmiyyətimizə qarşı müharibəni, nifaqı və sanksiyaları günü-gündən artırırlar. Onlar cəmiyyətimizdə fikir ayrılığı və parçalanma yaratmaqla öz məqsədlərinə nail olmaq istəyirlər. Bütün insanlar bərabərdir, hər bir insanın bərabər hüquqları var və başqaları ilə birlikdə ədalət və bərabərlik şəraitində yaşaya bilər. Bu, bizim istədiyimiz, lakin onların istəmədiyi şeydir. Kim deyib ki, dünyadakı hər hansı bir hökumətin digər hökumətləri öz bədxah məqsədlərinə tabe olmağa məcbur etmək hüququ var? Niyə? Kim deyib ki, digərlərinin heç bir hüququ olmadığı və hər şeydə onun iradəsinə tabe olmağa borclu olduğu halda, bir hökumət bütün dünyanın taleyini həll etməlidir? Bu, bizim qəbul etməyəcəyimiz bir şeydir və məhz buna görə də bədəl ödəyirik. Biz sağ olduqca, haqqa və ədalətə doğru can atdıqca, zülmün, tiranlığın və qorxudulmanın qarşısında baş əyməyəcəyik. Onlar bu haqda yalnız xəyal qura bilərlər”, – deyə Məsud Fezeşkian bildirib.