Gürcüstanın Daxili İşlər Nazirliyinin Sameqrelo-Zemo Svaneti Polis Departamentinin Martvili Rayon İdarəsinin əməkdaşları, “isti izlər”lə həyata keçirdikləri əməliyyat tədbirləri və istintaq hərəkətləri nəticəsində ailə üzvünə qarşı ağırlaşdırıcı hallarda qəsdən adam öldürməyə cəhd ittihamı ilə 1958-ci il təvəllüdlü M.C.-ni saxlayıblar.

“İstintaqda müəyyən edilib ki, Martvili Munisipalitetində təqsirləndirilən şəxs qarşılıqlı mübahisə zəminində övladı – 1994-cü il təvəllüdlü L.C.-yə ov tüfəngindən açdığı atəşlə üz və kürək nahiyəsindən xəsarətlər yetirib. Təcili tibbi yardım qrupu yaralı L.C.-ni tibb müəssisələrinə aparıb.

Təqsirləndirilən şəxs həyata keçirilmiş istintaq hərəkətləri nəticəsində polis tərəfindən “isti izlər”lə saxlanılıb. Hüquq-mühafizə orqanlarının əməkdaşları cinayətin törədildiyi silahı maddi sübut olaraq götürüblər”- Daxili İşlər Nazirliyinin məlumatında deyilir.

Ailə üzvünə qarşı ağırlaşdırıcı hallarda qəsdən adam öldürməyə cəhd faktı üzrə Cinayət Məcəlləsinin 19-109-cu maddəsinin “k” yarım bəndi ilə istintaq aparılır. Cinayət 16 ildən 20 ilədək müddətə azadlıqdan məhrum etməni nəzərdə tutur.