Sizin fəaliyyətiniz Gürcüstan iqtisadiyyatının inkişafı və ölkədə iş yerlərinin açılması üçün böyük əhəmiyyət kəsb edir. Dünyanın bir çox ölkələrində, o cümlədən yüksək inkişaf etmiş ölkələrdə Gürcüstanın cəsarətlə mövqe tuta bildiyi belə yüksək keyfiyyətli məhsullar yaratdığınız üçün sizə təşəkkür etmək istərdim, – İqtisadiyyat və Davamlı İnkişaf nazirinin müavini Mariam Kvrivişvili peşə gününü qeyd etmək üçün toplaşan fermerlərə belə müraciət etdi.

Gürcüstan Fermerlər Assosiasiyasının təşkilatçılığı ilə bu gün 2015-ci ildən qeyd olunur.

“Gürcüstan dövlətinin sizin tərəfinizdə durmaq üçün bir sıra instrumentləri var – istər texniki və maliyyə dəstəyi, istər kənd təsərrüfatı məhsullarının ixracının artımının təşviqi, o cümlədən azad ticarət sazişləri vasitəsilə. Şadam ki, biz son illər bununla bağlı ciddi nəticələr əldə etmişik və bu gün Gürcüstan məhsulları azad ticarət rejimi altında dünya istehlak bazarının 1/3 hissəsinə, 2,3 milyardlıq istehlak bazarına çıxa bilir. Üstəlik, biz bu istiqamətdə işləri uğurla davam etdiririk”, – deyə Mariam Kvrivişvili bildirib.

Tədbirdə uğur qazanmış 9 fermer müxtəlif nominasiyalar üzrə mükafatlandırılıb. Mövcud nominasiyalara bu il daha biri – “İlin aqroturizm obyekti” əlavə edildi, qalibi isə Mariam Kvrivişvili elan etdi. Tədbirdə dövlət və özəl sektorun, diplomatik korpusun, qeyri-hökumət, donor təşkilatların, sektor birliklərinin 200-dən çox nümayəndəsi iştirak edib.

Bu barədə məlumatı Gürcüstanın İqtisadiyyat və Davamlı İnkişaf Nazirliyinin mətbuat xidməti yayıb.