ABŞ ilə birbaşa uçuşlar hökumətimizin əsas prioritetidir, biz Amerika aviaşirkətləri ilə danışıqlar üçün bütün vasitələrdən və platformalardan istifadə edirik- bu haqda iqtisadiyyat və davamlı inkişaf nazirinin müavini Mariam Kvrivişvili açıqlayıb.

Mariam Kvrivişvili bildirib ki, ABŞ-dan dəstək almaq və ümumi səylərlə birbaşa hava nəqliyyatını təmin etmək vacibdir.

“Amerika Birləşmiş Ştatları ilə birbaşa uçuşlar hökumətimizin əsas prioritetidir. Biz ABŞ aviaşirkətləri ilə danışıqlar aparmaq üçün bütün vasitələrdən, platformalardan, görüşlərdən və konfranslardan istifadə edirik. Hansı sərnişin axınından bəhs etdiyimizi daim təhlil edirik. 2023-cü ildə Gürcüstan və ABŞ arasında tranzitlə 75 mindən çox insan səyahət edib. Hesab edirik ki, bu, Amerikada fəaliyyət göstərən aviaşirkətlərin Gürcüstanın turizm və aviasiya bazarına maraq göstərməsi üçün mühüm əsas və ilkin şərtdir. Həmçinin, Amerikadan turist axınının getdikcə artdığını görürük, bunun üçün ABŞ-da davamlı marketinq işləri aparırıq. Təbii ki, birbaşa uçuşların ölkəmizin iqtisadiyyatına böyük təsiri var, eyni zamanda, bunun böyük siyasi əhəmiyyəti və dəyəri var. İki ölkənin birgə səyləri ilə birbaşa hava nəqliyyatını təmin etmək və qəbul etmək üçün onların da dəstəyinin olması vacibdir” – deyə Mariam Kvrivişvili açıqlayıb.