Biz Gürcüstanın Avropa İttifaqına yaxınlaşmaq istəyini həmişə dəstəkləmişik və dəstəkləyəcəyik, inanırıq ki, Gürcüstanın yeri Avropa İttifaqındadır-deyə Malta Prezidenti Corc Vella bildirib.

Malta Prezidenti Gürcüstan parlamentinin sədri ilə görüşdə müzakirə olunan məsələlərdən danışıb, o cümlədən iki ölkə arasında müxtəlif istiqamətlərdə əlaqələrin fəallaşmasına diqqət çəkib.

“Biz Gürcüstanın Avropa İttifaqına yaxınlaşmaq istəyini həmişə dəstəkləmişik və dəstəkləyəcəyik. Xüsusən də 2008-ci ildən, Rusiya Gürcüstanı işğal edəndən sonra. Biz bilirik ki, iki region Rusiyayönlüdür və praktiki olaraq bir-birindən ayrılır. Biz inanırıq ki, Gürcüstanın yeri Avropa İttifaqındadır və ümid edirik ki, iqtisadi və siyasi inkişaf nəticəsində ölkə Avropa İttifaqının təklif edə biləcəyi imkanlardan tam istifadə etmək üçün daha da inkişaf edəcək. Bu çox vacibdir. Eyni zamanda, biz Gürcüstanın NATO-ya üzv olmaq istəyinə hörmətlə yanaşır və onu dəstəkləyirik. Biz neytral dövlət olsaq da, suveren dövlətin istəklərinə hörmətlə yanaşırıq. İndi biz 2008-ci il müharibəsinin gürcü xalqı üçün nə demək olduğunu daha yaxşı başa düşürük, çünki indi Ukraynada da eyni şeyin təkrarlandığını görürük. Bu, həm də parlament sədri ilə görüş çərçivəsində müzakirələrin tərkib hissəsi olub. Biz indi Gürcüstanda nə baş verdiyini daha yaxşı başa düşürük, çünki praktiki olaraq eyni şey Ukraynada da baş verir. Siz məndən nəyi müzakirə etdiyimizi soruşdunuz – təəssüf ki, bizim Gürcüstanla tez-tez görüşlərimiz olmur və daha çox olmalıdır. Biz Gürcüstanın vəziyyəti və onun ATƏT, Avropa Şurası kimi beynəlxalq təşkilatlarda iştirakı barədə danışdıq. Ölkələrimiz arasında heç bir problem yoxdur. Düşünürəm ki, biz əlaqələrimizdən daha çox ticarət, mədəniyyət və insanlar arasında əlaqələr baxımından istifadə edə bilərik. Bu, mənim mesajımın bir hissəsi idi”, – deyə Malta Prezidenti Corc Vella bildirib.