Avropaya İnteqrasiya Komitəsinin sədri Maka Bochorişvili Gürcüstan parlamentinin nümayəndə heyəti ilə birlikdə mayın 18-19-da Almaniya Federativ Respublikasında işgüzar səfər edəcək. Bu barədə parlamentin mətbuat xidməti məlumat yayıb.

Verilən məlumata əsasən, səfər çərçivəsində Gürcüstan parlamentinin nümayəndə heyətinin Bundestaqda Aİ Komitəsinin üzvləri, eləcə də Almaniyanın aparıcı siyasi fondları və tədqiqat mərkəzlərinin nümayəndələri ilə görüşləri nəzərdə tutulub. Səfər çərçivəsində Maka Bochorişvili Bundestaqda Aİ məsələləri üzrə komitənin sədri, Xarici əlaqələr komitəsinin sədri və komitənin digər üzvləri ilə ikitərəfli görüşlər keçirəcək. Federal Kansler Aparatı və Almaniya Federal Xarici İşlər Nazirliyində də görüşlərin keçirilməsi planlaşdırılır.

Gürcüstanın parlament nümayəndə heyətinin səfərinin məqsədi ölkənin Avropa İttifaqına inteqrasiyası və Gürcüstana Aİ-yə namizəd ölkə statusunun verilməsi ilə bağlı qərarların qəbulu prosesində Almaniyanın siyasi dairələrinin dəstəyini cəlb etməyə , həmçinin, ikitərəfli və çoxtərəfli formatlarda parlament əməkdaşlığını dərinləşdirmək və iki ölkə arasında siyasət, ticarət, iqtisadiyyat, turizm, mədəniyyət və təhsil sahələrində əlaqələrin gələcək inkişafına kömək etməyə xidmət edir.

Gürcüstan parlamentinin nümayəndə heyətinə Avropaya İnteqrasiya Komitəsinin sədrinin birinci müavini Levan Karumidze, komitənin üzvləri Teona Akubardia və Herman Sabo daxildir.