Maia Bitadze bildirib ki, Margus Tsahkna Gürcüstana münasibətdə kifayət qədər aqressiv və qərəzli bəyanatları ilə seçilir. Onun sözlərinə görə, Tsahknanın Gürcüstana qarşı açıqlamaları yeni deyil, çünki o, şəxsi maraqları əsasında hərəkət edir.

Bitadzenin fikrincə, Estoniyanın xarici işlər naziri müəyyən qrupun maraqlarını ifadə edir.

“Estoniyanın xarici işlər naziri beynəlxalq hüququn prinsiplərinə riayət etməkdən uzaqdır və biz bunu dəfələrlə görmüşük. Bu şəxs Gürcüstanla Baltikyanı ölkələr arasındakı münasibətlərdə mənfi rol oynayır. Fakt budur ki, onun bəyanatları qərəzli və qeyri-diplomatikdir. Eyni zamanda, o, müəyyən qrupun maraqlarını, o cümlədən Avropa bürokratiyasının maraqlarını ifadə edir. Həmin dairələrin məqsədi Gürcüstanda ikinci cəbhə açmaq idi. Bu şəxsin bəyanatlarının arxasında nələrin dayandığı artıq aydın görünür”, – deyə Maia Bitadze bildirib.

Qeyd edək ki, bundan əvvəl Margus Tsahkna Lüksemburqda xarici işlər nazirlərinin görüşündən əvvəl demişdi: “Çox təəssüflənirəm ki, Gürcü rejimi tamamilə başqa bir yol seçib, Avropa İttifaqına aparan yolu yox. Həqiqətən Avropa istiqamətini istəyən gürcü xalqına mesajım budur – ümidinizi itirməyin və buna uyğun davranın.”