Gürcüstanın maliyyə naziri Laşa Xutsişvili yaxın vaxtlarda hökumətin elektrik enerjisinin istehsalı istiqamətində yenilənmiş sxem təqdim edəcəyini bildirib. O, əlavə enerji tutumunun yaradılması üçün açıq hərrac elan ediləcəyini qeyd edib.

“Energetika hər zaman ölkənin inkişafı üçün strateji istiqamətlərdən biri olub, lakin bütün dünyanın üzləşdiyi bu şəraitdə enerji təhlükəsizliyi və enerji müstəqilliyi daha böyük önəm kəsb edir. Bu istiqamətdə , enerji sektorunda, konkret olaraq elektrik enerjisinin istehsalı istiqamətində yenilənmiş dəstək sxemini təqdim edirik. Hazırda missiyası Gürcüstanda olan Beynəlxalq Valyuta Fondu ilə işləri praktiki olaraq başa çatdırmışıq. Biz yeni enerji dəstəyi sxeminin əsaslanmalı olduğu əsas prinsipləri razılaşdırdıq. Bu, dövlət tərəfindən Gürcüstanda yeni elektrik enerjisi istehsalı obyektinin tikintisini təmin edən şirkətlərə müəyyən müqavilə qiyməti ilə bazar qiyməti arasında təminat verilməsini nəzərdə tutan müqavilə qiyməti ilə bazar qiyməti arasındakı fərq modelidir. Bu, həm su ehtiyatlarına, eləcə də günəş və külək enerjisi kimi digər bərpa olunan resurslara şamil olunacaq. Ümumi həcmdə razılığın əldə olunması vacibdir. Bu həcm ölkə üçün kifayət qədər vacibdir, yaxın üç ildə təxminən 1500 MVt olacaq. Bu həcmin bazara necə çıxarılmasının qrafiki də tərtib olunub və təbii ki, bu, açıq hərrac qaydalarına uyğun olaraq şəffaf şəkildə baş verəcək, bütün maraqlı şəxslər və ya investorlar hərracda iştirak etmək və öz rəqabətli təkliflərini təqdim etmək imkanı əldə edəcəklər. Bu istiqamətdə yaxın bir neçə gün ərzində müvafiq əmr hazırlayacağıq. Daha sonra yeni modeli daha yaxından tanımaq və daha sonra hərraclarda iştirak etmək üçün özəl sektor, investorlarla müzakirələr aparılacaq ki, bu da ölkədə növbəti üç ildə yeni elektrik stansiyalarının tikintisi prosesinə başlamağa imkan verəcək” – deyə maliyyə naziri Laşa Xutsişvili bildirib.