Laşa Xutsişvili Türkiyənin səfiri ilə görüşüb

Maliyyə naziri Laşa Xutsişvili Mustafa Türker Arı ilə görüşüb. O, Türkiyə Respublikasının Gürcüstanda yeni təyin olunmuş fövqəladə və səlahiyyətli səfiridir.

Gürcüstan Maliyyə Nazirliyi-nin məlumatına görə, tanışlıq xarakteri daşıyan görüşdə maliyyə naziri səfiri diplomatik fəaliyyətə başlaması münasibətilə təbrik edib və ona uğurlar arzulayıb.

Tərəflər iki ölkə arasında əməkdaşlıq məsələlərini, həm ikitərəfli münasibətlər, həm də regional əhəmiyyət daşıyan layihələr çərçivəsində müzakirə ediblər.

Görüşdə iki ölkənin gömrük administrasiyaları arasında mövcud olan sıx tərəfdaşlığa xüsusi diqqət yetirilib. Bu əməkdaşlıq sərhədkeçmə prosedurlarının asanlaşdırılması, tranzit imkanlarının gücləndirilməsi, malların və sərnişinlərin maneəsiz hərəkətinin təmin edilməsi, eləcə də ticarətin təşviqi məsələlərini əhatə edir.

Türkiyənin səfiri iki ölkə arasında əməkdaşlığın daha da inkişafına maksimum dəstək verməyə hazır olduğunu bildirib.

Görüşdə maliyyə nazirinin müavini Ekaterine Guntsadze də iştirak edib.