Gürcüstanın xarici işlər naziri İlia Darçiaşvili İŞİD-ə qarşı Qlobal Koalisiyanın Nazirlər Toplantısı çərçivəsində İspaniya Krallığının xarici işlər naziri Xose Manuel Albares ilə görüşüb.

Gürcüstan Xarici İşlər Nazirliyinin məlumatına görə, nazirlər Gürcüstan və İspaniya arasında dostluq və tərəfdaşlıq münasibətlərini və yüksək səviyyəli sıx təmasları müzakirə ediblər. Ölkələr arasında diplomatik münasibətlərin qurulmasının yubiley tarixi müsbət qiymətləndirilib, bu da ikitərəfli əlaqələrin möhkəmləndirilməsi üçün gələcək perspektivlərin müəyyən edilməsi istiqamətində yaxşı imkan yaradır. Görüşdə Gürcüstanın Avropaya inteqrasiya gündəliyi müzakirə edilib və bu baxımdan İspaniyanın dəstəyi qeyd edilib, bu da Gürcüstanın Aİ-yə üzvlük üçün müraciəti və Aİ-nin özünüqiymətləndirmə sorğusunun müzakirəsi zamanı xüsusi əhəmiyyət kəsb edir. Gürcüstanın Avropa və Avro-Atlantik inteqrasiya yolunda göstərdiyi səyləri və Assosiasiya Sazişinin imzalanmasından sonra əldə edilmiş əhəmiyyətli irəliləyiş yüksək qiymətləndirilib. Nazirlər Avropa İttifaqı tərəfindən həm Gürcüstan, həm də Assosiativ Üçlük ölkələrinin səylərinə əlavə dəstəyin zəruriliyini vurğulayıblar. Regional təhlükəsizlik məsələlərindən danışan nazirlər Gürcüstanın işğal olunmuş regionlarında vəziyyəti qiymətləndiriblər, həmçinin Ukraynada davam edən müharibədən və bu proseslərin dünya təhlükəsizliyinə mənfi təsirindən narahat olduqlarını bildiriblər.

Gürcüstan Xarici İşlər Nazirliyinin məlumatına görə, İlia Darçiaşvili və Xose Manuel Albares Gürcüstan və İspaniya arasında ikitərəfli münasibətlərin müxtəlif sahələrini, o cümlədən ticarət-iqtisadi və turizm sahələrində əməkdaşlığın gücləndirilməsi imkanlarını müzakirə ediblər və nazirlər yüksək səviyyəli təmasların intensivləşdirilməsi barədə razılığa gəliblər. İlia Darçiaşvili həmkarını Gürcüstana səfərə dəvət edib.