Kelli Deqnan – Biz istənilən məhkəmə islahatı səylərini dəstəkləməyə hazırıq

ABŞ-ın Gürcüstandakı səfiri Kelli Deqnan jurnalistlərə bildirib ki, ABŞ uzun müddətdir ki, sistemin qərəzsizliyini, müstəqilliyini və məhkəmə səriştəsini gücləndirməyə yönəlmiş Gürcüstanın məhkəmə islahatları prosesində tərəfdaşdır.

Kelli Deqnanın qeyd etdiyi kimi, Birləşmiş Ştatlar ədliyyə islahatlarının aparılması üçün istənilən səyləri dəstəkləməyə hazırdır.

“ABŞ uzun müddətdir ki, sistemin qərəzsizliyini, müstəqilliyini və məhkəmə səriştəsini gücləndirməyə yönəlmiş Gürcüstanın ədliyyə islahatları prosesində tərəfdaşdır. Biz istənilən islahat səylərini dəstəkləməyə hazırıq. Qanunun praktikada tətbiqindən bəhs edən bu tədbirə bu gün ev sahibliyi etməyimiz onu dəstəkləməyə davam etdiyimizə işarədir.

Deyərdim ki, artıq həyata keçirilən beynəlxalq tövsiyələr var. Biz buna töhfə vermişik, Parlament ilə işləmişik. Gürcüstanın ədliyyə sistemini gücləndirmək yolları ilə bağlı Venesiya Komissiyasının tövsiyələri, ABŞ və digər beynəlxalq ekspertlərin tövsiyələri hələ də var. Ümid edirəm ki, növbəti addım bu tövsiyələri həyata keçirmək olacaq. Bu, çox vacibdir, çünki biz gördük ki, Gürcüstanın siyasi liderləri artıq razılaşıblar ki, bunlar zəruri islahatlardır və prioritet olmalıdır. İlk növbədə, bu tövsiyələri prioritet edin və biz ədliyyə sisteminin daha da gücləndirilməsi ilə bağlı müzakirələrdə iştirak etməkdən məmnun olarıq”, – Kelli Deqnan bildirib.

Gürcüstan Parlamentinin Xarici Əlaqələr Komitəsinin sədri Nikoloz Samxaradze parlamentin bu gün keçirilən iclasında parlament nümayəndə heyətinin ABŞ-a səfərinə yekun vurub və deyib ki, Qərbdən keçmiş və ya indiki yüksək vəzifəli hakimləri məhkəmə islahatları prosesində işə cəlb etməyə hazırdırlar.