ABŞ-ın Gürcüstandakı səfiri Kelli Deqnan bu gün Beynəlxalq Qara Dəniz Universitetində (IBSU) Amerikaşünaslığın 13-cü Beynəlxalq Konfransının açılışını edib.

Kelli Deqnan ABŞ-ın Gürcüstandakı səfirliyi və Beynəlxalq Qara Dəniz Universitetinin Gürcüstanda Amerikaşünaslıq proqramını inkişaf etdirmək üçün illərdir tərəfdaş olduqlarını bildirib.

“Bu, sadəcə ingilis dilini öyrənməkdən daha çox şeydir. Tələbələr tənqidi düşüncəni öyrənirlər, onlar təkcə bütün regiondan deyil, həm də xaricdən, o cümlədən Amerikadan gəlirlər. Onlar birlikdə həm ABŞ, həm də Gürcüstan üçün çox vacib olan mövzuları müzakirə edir və danışırlar”- deyə səfir bildirib.

Beynəlxalq Qara Dəniz Universitetinin rektoru, doktor Saffet Bayraktutan bildirib ki, Amerikaşünaslıq üzrə bakalavr, magistratura və doktorantura proqramlarının yüksək səviyyəsi məzunların yüksək təhsil keyfiyyəti və Amerika səfirliyinin universitet və bu proqramlara daimi dəstəyi ilə təsdiqlənir.

Sosial, Humanitar Elmlər və Təhsil Fakültəsinin dekanı Tamar Şioşvili konfransda siyasət, tarix, mədəniyyət, ədəbiyyat, qadın hüquqları, təhsil, incəsənət və iqtisadiyyat məsələlərinin müzakirə olunduğu dörd sessiyanın işlədiyini bildirib.

“Sessiyalarda alimlərlə yanaşı, uğurlu tələbələrimiz də iştirak edirlər. Onların öz məruzələrini təqdim etmək və müzakirələrdə iştirak etmək imkanı var” – deyə Tamar Şioşvili qeyd edib.

Konfransın açılış tədbiri “Tbilisi Big Band”in konserti ilə başa çatıb.

İBSU-nun Sosial, Humanitar və Təhsil Elmləri Fakültəsinin təşkilatçılığı ilə Amerikaşünaslığın illik beynəlxalq konfransı keçirilib. Konfransda 36 gürcü və xarici tədqiqatçı iştirak edib. 2022-ci ildə keçirilən 13-cü konfrans ABŞ və Gürcüstan arasında diplomatik əlaqələrin 30-cu ildönümünə həsr olunub.