Ötən 30 ildə xatırlamalı olduğumuz çox şey var və biz gələcək illəri səbirsizliklə gözləyirik -bu barədə ABŞ-ın Gürcüstandakı səfiri Kelli Deqnan Gürcüstan və ABŞ arasında diplomatik münasibətlərin 30-cu ildönümünə həsr olunmuş tədbirdə deyib.

Onun sözlərinə görə, ABŞ və Gürcüstanın son 30 ildə əldə etdiyi uğur qürurvericidir.

“Bu gün ABŞ-Gürcüstan diplomatik əlaqələrinin 30-cu ildönümünü qeyd etmək üçün buradayıq. ABŞ və Gürcüstanın bu 30 ildə əldə etdiyi uğurdan böyük qürur duyuruq. Bunu getdiyim hər yerdə görürəm. Gürcüstanın regionlarına səfər edəndə bunu Minillik Çağırış Fondu vasitəsilə birlikdə tikdiyimiz məktəblərdə görürəm; Fermerlərin istehsal edərək, yeni bazarlarda daha yüksək qiymətə satdıqları məhsullarda görürəm; Sahil Mühafizəsi, Sərhəd Polisi, Gömrük və Hüquq-mühafizə orqanlarının əməkdaşlarının yerinə yetirdikləri heyrətamiz fəaliyyətdə görürəm. Təbii ki, ölkənin təhlükəsizliyini və sərhədlərini qoruyan Gürcüstan Müdafiə Qüvvələrinin cəsur nümayəndələri ilə güclü əməkdaşlıqda görürəm. Həqiqətən gələcək əməkdaşlığı səbirsizliklə gözləyirik. Gürcüstanın baş nazirinin, xarici işlər nazirinin və USAİD-in administratorunun müavininin bu günlə əlaqədar tədbirdə iştirakı bizim üçün qürurvericidir. Düşünürəm ki, bu Gürcüstanın ABŞ üçün nə qədər önəmli olduğuna işarədir. Ötən 30 ildə xatırlamalı olduğumuz çox şey var və biz gələcək illəri səbirsizliklə gözləyirik” -deyə Kelli Deqnan bildirib.