Samqori rayonunda, Meqobroba küçəsi yaxınlığında ümumilikdə yeddi hektar olan ərazidə meşə-park yenilənəcək – bu haqda Tbilisinin meri Kaxa Kaladze munisipalitet hökumətinin bugünkü iclasında deyib.

O, Varketili təsərrüfatının keçmiş ərazisində artıq qanunsuz hasarların söküldüyünü, eləcə də seyrəkləşmə-təmizləmə məqsədi ilə özbaşına əkilən bitkilərin kəsildiyini bildirib.

“Layihə çərçivəsində cari ildə 3,5 hektar ərazidə piyada yolları, istirahət pavilyonları, xarici işıqlandırma, uşaq zonaları təşkil olunacaq. Ağaclar və bitkilər əkiləcək. Gələn il isə qalan sahədə eyni işlər aparılacaq. Şəhərimiz yaşıllıq ərazilərinin olmasına çox ehtiyac duyur” – Kaxa Kaladze bildirib.

O, sözügedən layihənin 2025-ci ilin sonuna kimi başa çatdırılacağını bildirib.