Tbilisi meri Kaxa Kaladze Tbilisi Meriyasında UFC-nin ilk gürcü çempionu İlia Topurianı qəbul edib.

Kaxa Kaladze onu qələbə münasibətilə şəxsən təbrik edib və ona gələcəkdə daha böyük uğurlar arzulayıb.

“Qazandığınız qələbə münasibətilə sizi ürəkdən təbrik etmək istəyirəm. Siz qürurverici insansınız və zəhmətin qədrini bilirsiniz. Sizin qələbəniz Gürcüstanın qələbəsidir. Belə uğurlu olduğunuza çox şadam və əminəm ki, pərəstişkarlarınızı qarşıda daha çox sevinc gözləyir. Çox sayda gürcünün sizi sevdiyini bilmənizi istəyirəm. Həm də bu gün sizə təqdim olunacaq “Şərəf ” ordeni münasibətilə sizi təbrik edirəm” – deyə Kaxa Kaladze görüşdə qeyd edib.

O, həmçinin Gürcüstan millisinin Avropa çempionatının pley-off turunun yarımfinalında iştirakının vacibliyini vurğulayıb və milli komandanı dəstəklədiyinə görə İlia Topuriaya təşəkkür edib.

“Bu gün bizim vacib oyunumuz var və kəməri matçdan əvvəl təqdim etməniz oyunçular və azarkeşlər üçün daha böyük stimuldur. Əminəm ki, biz bu gün qələbəni yenidən birlikdə qeyd edəcəyik” – deyə Kaxa Kaladze açıqlayıb.

Gürcü çempion səmimi və mehriban görüşə görə paytaxtın meri Kaxa Kaladzeyə, həmçinin onun yanında olan bütün azarkeşlərə təşəkkür edib.

“Yanımda olduğunuz üçün sizə və hər kəsə təşəkkür edirəm. Bu günlərdə Gürcüstanda hiss etdiyim mənə yönəlik azarkeşlik bütün gözləntiləri üstələdi. Bu gün “Dinamo Arena”da tamaşaçılar qarşısında çıxışım mənim üçün böyük şərfdir” – İlia Topuria qeyd edib.

Yüngül çəki dərəcəsində UFC-nin çempionu baş nazir İrakli Kobaxidzenin dəvəti ilə vətənə gəlib.

Bu gün “Dinamo Arena”da keçiriləcək Gürcüstan-Lüksemburq futbol matçından əvvəl İlia Topuria gürcü azarkeşlərə çempionluq kəmərini təqdim edəcək.