Gürcüstan-Çexiya matçına biletsiz qalan vətəndaşların ürək ağrısını yaxşı başa düşürəm. – Paytaxtın meri Kaxa Kaladze bu barədə Tbilisi bələdiyyəsinin hökumətinin iclasında bildirib.

Kaladzenin qeyd etdiyi kimi, sentyabrın 7-də Mixail Mesxi stadionunda keçirilməsi planlaşdırılan Gürcüstan – Çexiya oyununa maraq çox yüksəkdir.

“Bildiyiniz kimi, UEFA Millətlər Liqasının 2024-2025-ci il mövsümünün ilk oyununu Gürcüstan millisi Çexiyaya qarşı keçirəcək. Qarşılaşma sentyabrın 7-də, saat 20:00-da Mixail Mesxi adına stadionda keçiriləcək. Gözlənildiyi kimi, gürcü azarkeşlərin sözügedən oyuna böyük marağı var ki, bunu ən qısa müddətdə satılan bütün biletlər də təsdiqləyir. Gürcüstan millisi son vaxtlar ciddi uğur qazanıb ki, bu da təbii ki, təsadüfi deyil. Bu, hər bir futbolçunun, məşqçilər komandasının, futbol federasiyasının böyük əməyinin və Gürcüstan hökumətinin idmanın inkişafı sahəsində göstərdiyi səylərin nəticəsidir.

Həm də azarkeşlərimizin, futbolsevərlərimizin rolunu qeyd etməyə bilmərəm ki, onların dəstəyi futbolçulara ən böyük enerji verir. Biz təkcə Gürcüstanda deyil, Almaniyada, Avropa çempionatında gürcü azarkeşlərlə dolu tribunalar gördük. Futbolçularımız üçün stadionda heyrətamiz atmosfer yaratdıqları üçün onlara təşəkkür edirəm. Buna görə də Gürcüstan-Çexiya matçına biletsiz qalan vətəndaşların yaşadıqları ürək ağrısını yaxşı başa düşürəm”. – Tiflis meri bildirib.

Onun sözlərinə görə, sentyabrın 7-də Respublika meydanında futbol matçının açıq nümayişi təşkil olunacaq.

“Bir daha təkrar edirəm, azarkeşlərin dəstəyi oğlanlarımız üçün çox vacibdir. Ona görə də hamımız istərdik ki, matça mümkün qədər çox tamaşaçı gəlsin. Futbol Federasiyası ilə birlikdə qərar verdik: biletsiz qalanlar üçün saat 19:00-da Respublika meydanında açıq nümayiş keçirəcəyik. Azarkeşlər üçün hər cür şərait yaradılacaq. Sahədə çox böyük ekranlar quraşdırılacaq, qida obyektləri yerləşdiriləcək. Milli komandamıza uğurlar arzulayıram. Əminəm ki, oğlanlar gürcü azarkeşlərini bir daha sevindirəcəklər”. – deyə paytaxt meri bildirib.

Kaxa Kaladze son günlər siyasətçilərin “Dinamo Arena”nın təhlükəsizliyi ilə bağlı verdiyi açıqlamalara da diqqət çəkib və bunların spekulyasiya olduğunu qeyd edib.

“Bu günlərdə biz çoxlu absurd bəyanatlar, o cümlədən siyasətçilərin “Dinamo Arena”da matç keçirmək təhlükəsiz olduğu barədə fərziyyələr eşitdik, sadəcə olaraq, bunun üçün siyasi iradə yoxdur. Artıq Futbol Federasiyası bu məsələyə münasibət bildirib. Mən təfərrüata varmayacağam və spekulyasiya ilə bağlı açıqlama verməyəcəyəm. Düşünürəm ki, təhlil edə bilən bütün düşünən insanlar hər şeyi yaxşı başa düşəcək və belə siyasətçilərə layiqli cavab verəcəklər. – Kaxa Kaladze dedi.