Ceyhun Bayramov – Azərbaycan Avropa və Asiya arasında mühüm nəqliyyat-logistika mərkəzinə çevrilib

Azərbaycan Avropa və Asiya arasında mühüm nəqliyyat-logistika mərkəzinə çevrilib, – bu barədə Azərbaycan xarici işlər naziri Ceyhun Bayramov BMT Baş Assambleyasının 81-ci sessiyasının ümumi müzakirələrində çıxışı zamanı bildirib.

Onun sözlərinə görə, 2022-ci ildən bəri Orta Dəhliz vasitəsilə yük daşımalarının həcmi təxminən 90 faiz artıb.

Ceyhun Bayramovun qeyd etdiyi kimi, Bakı Beynəlxalq Dəniz Ticarət Limanı və Bakı-Tbilisi-Qars Dəmir Yolu kimi layihələr Asiya və Avropa arasında daha dayanıqlı və şaxələndirilmiş təchizat zəncirlərinin yaradılmasına töhfə verir.

Onun sözlərinə görə, “Rəqəmsal İpək Yolu” layihəsi Azərbaycanın regional rəqəmsal mərkəz kimi rolunu gücləndirməyə kömək edəcək.

Ceyhun Bayramov vurğulayıb ki, “Beynəlxalq Sülh və Rifah naminə Tramp Marşrutu” Naxçıvan Muxtar Respublikası ilə maneəsiz, multimodal nəqliyyat əlaqəsinin təmin olunmasına xidmət edəcək, həmçinin regional ticarət və iqtisadi inteqrasiya üçün yeni imkanlar açacaq.

Çıxışının sonunda Azərbaycan xarici işlər naziri qlobal həmrəyliyin gücləndirilməsinə, beynəlxalq hüquqa əsaslanan daha səmərəli və etibarlı çoxtərəfli əməkdaşlığın və sistemin yenilənməsinə çağırıb.

“İnandığımız çoxtərəfli əməkdaşlıq məhz prinsiplərə əsaslanan, inklüziv və hər şeydən əvvəl konkret nəticələr əldə etməyə qadir olan əməkdaşlıqdır”, – Ceyhun Bayramov bildirib.