İtaliyanın bir neçə şəhərində nümayişlər keçirilir, aksiya iştirakçıları yaşayış xərclərinin bahalaşmasına etiraz edir və hökumətin istefasını tələb edirlər

İtaliyanın bir neçə şəhərində nümayişlər keçirilir. Aksiya iştirakçıları yaşayış xərclərinin bahalaşmasına etiraz edir və hökumətin istefasını tələb edirlər. İtaliya mediası məlumat yayır.

Bununla yanaşı, bir neçə İtaliya həmkarlar ittifaqının çağırışı ilə ölkədə ümummilli tətil də başlayıb.

Romanın mərkəzində yerləşən Tasso gimnaziyasının şagirdləri məktəbi blokadaya alıb, binanın divarlarına rəsmlər çəkib və bəyan ediblər ki, bu, öz tələblərini səsləndirmək üçün onların şansıdır.

Ölkənin digər şəhərlərində də məktəblərin blokadası başlayıb. Milanda Politexnik Universitetinin qarşısında bir neçə yüz tələbə toplaşıb.

Turində tələbələr, müəllimlər və həmkarlar ittifaqı üzvləri şəhər meriyasına doğru yürüş ediblər. Təşkilatçılar aksiyaya 50 mindən çox insanın qoşulduğunu bildirirlər.

Venesiyada tələbə və işçilərin yürüşü polis kordonu tərəfindən dayandırılıb. Polis kordonu yarmaq cəhdlərinin qarşısını almaq üçün rezin dəyənəklərdən istifadə edib. Neapol, Palermo və Boloniyada da nümayişlər davam edir.