İsraildə həlak olanların xatirəsinə ehtiram əlaməti olaraq vətəndaşlar Tbilisinin Böyük Sinaqoqu yaxınlığına gül-çiçək gətirirlər.
Vətəndaşlar arasında turizm məqsədilə Gürcüstanda olan İsrail vətəndaşları da var.

İsrail vətəndaşlarından biri olan Mixail Şitinburqun dediyi kimi, o, İsrailin düşməninə qarşı döyüşdə həlak olanları yad edəcək.

“Mən İsraildənəm, İsrailin şimalında yaşayıram. Düşmənimizə qarşı döyüşərək həlak olanların xatirəsini ehtiramla yad etmək istəyirəm. İsrail sülhsevər ölkədir. Xalqımıza yaxın olmaq və belə çətin anda onlara dəstək olmaq üçün tezliklə vətənimizə qayıtmaq istəyirik” – Şitinburq bildirib.

Eyni zamanda, turistik məqsədlə Gürcüstanda olan Qabriela Rosansk qeyd edib ki, “Həmas”ın İsrailə hücumu İkinci Dünya Müharibəsini xatırladır.

“Sizin gözəl şəhəriniz Tbilisini ziyarət edirik. Tbilisidəki sinaqoqda amansız hücum nəticəsində həlak olan israillilərin xatirəsinin yad edilməsi bizim üçün çox emosional idi. “Həmas” qadınları, kişiləri, uşaqları, qocaları güllələyir. Bütün bunlar bizə İkinci Dünya Müharibəsini xatırladır. Biz dünyadan, Qırmızı Xaç Cəmiyyətindən, bütün qurumlardan girovların başına gələnləri bilmək üçün bizə kömək etmələrini xahiş edirik”- deyə Qabriela Rosansk bildirib.