İsrail hakimiyyəti İordan çayının qərb sahilində hava hücumu nəticəsində iki yüksək rütbəli Həmas döyüşçüsünün öldürüldüyünü açıqlayıb. Cenin şəhərində bir avtomobilə hava zərbəsi endirilib.

İsrail Müdafiə Qüvvələri və Təhlükəsizlik Agentliyinin məlumatına görə, ölənlər İordan çayının qərb sahilinin şimal hissəsinin sakinləri Əhməd Əbu Ara və Rafet Davasdır.

İsrail hakimiyyətinin məlumatına görə, onların hər ikisi ötən həftə İsrail vətəndaşının ölümü ilə nəticələnən hücumda iştirak ediblər.

HƏMAS-ın hərbi qanadı Əl-Qəssam Briqadaları dərc etdiyi bəyanatda Cenin bölgəsinə endirilən hava hücumu nəticəsində iki döyüşçünün həlak olduğunu təsdiqləyir.

Elə həmin gün, bir qədər əvvəl qrup, İordan çayının qərb sahilində yerləşən döyüşçülərin Mehola qəsəbəsi yaxınlığında bir İsrail əsgərini öldürdüklərini və sağ-salamat öz bazalarına qayıtdıqlarını açıqlamışdı.