İsrail ordusunun Qəzza zolağında ötən gün ərzində keçirdiyi əməliyyatda azı 40 nəfər həlak oldu. Qəzza Səhiyyə Xidmətinin məlumatına görə, İsrailin hücumları nəticəsində 75 nəfər yaralandı.

İsrail ordusu Qəzza şəhərinin Şucaya rayonunda da itkiylə nəticələnən xüsusi əməliyyatı davam etdirir.

İsrailin Müdafiə Qüvvələrinin məlumatına görə, Misirin sərhədinin yaxınlığında yerləşən Rafah şəhərində “HƏMAS”ın 30 döyüşçüsü öldürüldü. Həmçinin, Qəzzanın cənubunda yerləşən Xan Yunis şəhərində iki raket buraxıcısına qarşı hava hücumları həyata keçirildi.

Oktyabrın 7-dən bəri ərəb anklavında qurbanların sayı 38 193 nəfərə çatır, 87 903 nəfər isə yaralandı. Mövcud məlumatlara əsasən, ölənlər arasında 15 983 uşaq və 10 637 qadın var.