İranda bildirirlər ki, Amerika Birləşmiş Ştatları və İsraillə münaqişəni həll etməyin yeganə yolu diplomatiyadır

İranda bildiriblər ki, Amerika Birləşmiş Ştatları və İsraillə münaqişəni həll etməyin yeganə yolu diplomatiyadır. Bu bəyanat ABŞ Prezidenti Donald Trampın Hörmüz boğazının açılması və hərbi əməliyyatların dayandırılması barədə İranın təklifini rədd etdiyini bildirməsindən sonra verilib. “Reuters” agentliyi məlumat yayır.

“Bizim şərtlərimiz aydındır və Hörmüz boğazının açılması istiqamətində atılacaq hər hansı addım bu şərtlərin yerinə yetirilməsindən asılıdır. Bu çıxılmaz vəziyyətdən çıxış yolu yalnız danışıqlar vasitəsilə mümkündür”, – İran xarici işlər naziri Abbas Əraqçi bildirib.

Əraqçinin bildirdiyinə görə, Trampın açıq bəyanatlarına baxmayaraq, İran və ABŞ arasında danışıqlara vasitəçilik edən tərəflərə bu planın ABŞ tərəfindən rədd edilməsi barədə rəsmi olaraq heç bir məlumat ötürülməyib.

“Biz vasitəçilərin yekun mövqeyi çatdırmasını gözləyirik və qərarımızı buna əsasən verəcəyik”, – Əraqçi qeyd edib.

Məlumat üçün bildirək ki, bundan əvvəl Tramp Ağ Evdə jurnalistlərə Tehrandan gələn təklifin “qəbuledilməz” olduğunu və İranın Hörmüz boğazının dərhal açılması barədə razılığa gəlmək istədiyini, çünki “onların ağır şəkildə məğlub olduqlarını” bildirib.