İran mediasının məlumatına görə, İran və Oman arasında Hörmüz boğazında yeni tranzit marşrutlarına dair razılıq əldə olunub və rəsmi təqdimatın yaxın vaxtlarda keçirilməsi planlaşdırılır

İran və Oman arasında Hörmüz boğazında yeni tranzit marşrutlarına dair razılıq əldə olunub və bunun rəsmi təqdimatı yaxın dövrdə planlaşdırılır. Bu barədə İranın “Tasnim” xəbər agentliyi mənbəyə istinadən məlumat yayır.

Mənbənin məlumatına görə, razılaşma yalnız İran və Oman arasında imzalanıb. Bu sazişin təfərrüatları, o cümlədən yeni dəniz marşrutları və tranzit qaydaları Omanda Fars körfəzinə həmsərhəd ölkələrin xarici işlər nazirlərinin iştirakı ilə keçirilməsi planlaşdırılan görüşdə məlum olacaq.

Medianın yazdığına görə, İran və Oman arasında əldə olunmuş razılaşma Hörmüz boğazında yeni giriş və çıxış marşrutlarının yaradılmasını nəzərdə tutur. Plana əsasən, Fars körfəzi istiqamətində gedən marşrut tamamilə İranın ərazi sularından keçəcək və əks istiqamətdəki marşrutun bir hissəsi də həmçinin İran sularında olacaq. Bu marşrutlar üzrə hərəkət isə İran tərəfindən müəyyən edilmiş qaydalara uyğun olaraq həyata keçiriləcək.

Yeni sistem qüvvəyə mindikdən sonra ABŞ-nin açılmasını tələb etdiyi cənub marşrutu bağlanacaq. Son dövrlərdə İran və ABŞ arasındakı gərginliyin əsas səbəblərindən biri kimi məhz bu məsələ nəzərdən keçirilirdi.

İran agentliyinin mənbəsi vurğulayır ki, İran və Oman arasında əldə olunmuş razılaşma Hörmüz boğazının dərhal açılması demək deyil. Elə həmin mənbənin məlumatına görə, Hörmüz boğazının tamamilə açılması ABŞ-nin addımlarından, Vaşinqtonun İran tərəfindən irəli sürülmüş yeddi şərti yerinə yetirib-yetirməyəcəyindən asılı olacaq. İran vasitəçilər vasitəsilə ABŞ-yə yeddi şərt ötürüb və Tehran onların yerinə yetirilməsini boğazın açılmasının ilkin şərti hesab edir. Bu şərtlər İranın ali rəhbərliyi tərəfindən təsdiqlənib və sözügedən şərtlər yerinə yetirilməyənə qədər boğaz bağlı qalacaq.