Gürcüstanın baş prokuroru İrakli Şotadze Azərbaycanda rəsmi səfərdədir.

Gürcüstan Prokurorluğunun məlumatına görə, İrakli Şotadze səfər çərçivəsində Azərbaycan Respublikasının Baş prokuroru Kamran Əliyevlə görüşüb. İdarədən verilən məlumatda, görüşdə Gürcüstanın baş prokurorunun birinci müavini Bakur Abuladze, Gürcüstan və Azərbaycan prokurorluqlarının nümayəndələrinin iştirak etdiyi deyilir.

“Görüşdə tərəflər iki ölkə arasında ədalət mühakiməsi istiqamətində əməkdaşlığın əhəmiyyəti, cinayətkarlıqla mübarizədə təcrübə mübadiləsi, Gürcüstan və Azərbaycanda son illərdə cinayət mühakiməsi sahəsində əldə olunan nailiyyətlər və çağırışlar və bundan sonra cinayətkarlığa qarşı birgə səmərəli mübarizənin daha da gücləndirilməsi barədə danışıblar.

Görüşün sonunda Azərbaycan tərəfi Gürcüstan Prokurorluğunun nümayəndələrinə Azərbaycan Prokurorluğunun tarixi muzeyinə və Prokurorluğun yeni inzibati binasına ekskursiya təşkil edib.

Azərbaycana rəsmi səfərinin ikinci günündə Gürcüstanın baş prokuroru İrakli Şotadze və Azərbaycanın baş prokuroru Kamran Əliyev Azərbaycan Respublikasının Baş naziri Əli Əsədov ilə görüşüblər.

Baş nazirlə görüşdə iki ölkənin prokurorluqları arasında əməkdaşlığın gücləndirilməsi barədə danışılıb”, -deyə məlumatda deyilir.