“Gürcü Arzusu”nun sədri, parlament çoxluğunun lideri İrakli Kobaxidze nümayəndə heyətinin üzvləri Qiorqi Volski və İrakli Mezurnişvili ilə birlikdə Macarıstan parlamentinin Avropa İttifaqı məsələləri üzrə komitəsinin rəhbəri Cudit Varqa ilə görüşüb.

“Gürcü Arzusu”nun mətbuat xidmətinin yaydığı məlumata əsasən, Budapeştə rəsmi səfər çərçivəsində keçirilən görüşdə komitə rəhbəri bir daha qeyd edib ki, Macarıstanın həm qanunvericilik, həm də icraçı hakimiyyət orqanlarında rəsmi şəxslər Gürcüstana namizəd statusunun verilməsini qeyd-şərtsiz dəstəkləyirlər.

İrakli Kobaxidze Cudit Varqaya təşəkkür edib, Macarıstanın və digər Avropa ölkələrinin Gürcüstanın Avropaya inteqrasiyası ilə bağlı qəti mövqeyinin dekabrın 14-15-də namizəd statusunun rəsmiləşdirilməsində öz əksini tapacağına ümidvar olduğunu bildirib.

Tərəflər Gürcüstan və Macarıstan arasında əməkdaşlığın daha da dərinləşdirilməsindən danışıblar.