Gürcüstanın Azərbaycanla iki ölkəyi iqtisadi və strateji baxımdan birləşdirən bir sıra mühüm birgə layihələri var, – bu barədə Gürcüstanın Baş naziri İrakli Kobaxidze Bakıda Zaqulba sarayında Azərbaycan Respublikasının Prezidenti İlham Əliyevlə birgə bəyanatında bildirib.

Kobaxidzenin sözlərinə görə, artıq həyata keçirilmiş irimiqyaslı meqalayihələr və bu istiqamətdə mühüm planlar var.

“Bu gün görüşdə birgə səylərlə həyata keçirilə biləcək müxtəlif layihələrə toxunduq və bütün istiqamətlərdə əməkdaşlığın çox ciddi inkişaf perspektivi var. Bizim qeyri-adi dərəcədə yüksək səviyyədə ticarət-iqtisadi əlaqələrimiz var. Azərbaycan şərtlər baxımından Gürcüstanın ticarət tərəfdaşlarının beşliyindədir və təbii ki, bu baxımdan da tərəfdaşlığımızın daha da inkişaf etdirilməsi vacibdir. Nəqliyyat və energetika sahələrində əməkdaşlığın inkişafı üçün böyük perspektiv var və bu barədə Prezident Əliyev də danışıb.

Münasibətlərin yüksək səviyyədə davam etdirilməsi çox vacibdir. Səfərlər, yüksək səviyyəli görüşlər tərəfdaşlığımızı, əməkdaşlığımızı daha da dərinləşdirmək üçün çox mühüm vasitədir. Biz bu əməkdaşlığı inkişaf etdirmək üçün əlimizdən gələni edəcəyik”, – deyə İrakli Kobaxidze bildirib.