Gürcüstanın Baş naziri İrakli Kobaxidze Brüsselə ilk səfərinə yollanıb.

Səfər çərçivəsində baş nazir Avropa İttifaqı və NATO-da ikitərəfli görüşlər planlaşdırıb.

Baş nazirin mətbuat xidmətinin yaydığı məlumat üzrə, İrakli Kobaxidze Gürcüstan-Avropa İttifaqı Assosiasiya Şurasının 8-ci iclasında iştirak edəcək, ondan sonra da baş nazir İrakli Kobaxidzenin Avropa İttifaqının xarici işlər və təhlükəsizlik siyasəti məsələləri üzrə ali nümayəndəsi, Avropa Komissiyasının vitse-prezidenti Cozef Borrell və Avropa Qonşuluq Siyasəti və Genişlənmə Məsələləri üzrə Avropa komissarı Oliver Varhei ilə birgə mətbuat konfransı keçiriləcək.

Səfər çərçivəsində hökumət başçısı NATO-nun baş katibi ilə görüş keçirəcək, həmçinin NATO-Gürcüstan Komissiyasının iclasında iştirak edəcək.

Baş nazir Brüsselə tərkibinə birinci vitse baş nazir, iqtisadiyyat və davamlı inkişaf naziri Levan Davitaşvili; Vitse baş nazir, müdafiə naziri İrakli Çikovani; Xarici işlər naziri İlia Darçiaşvili və barışıq və vətəndaş bərabərliyi üzrə dövlət naziri Tea Axvledianinin daxil olduğu hökumət nümayəndə heyəti ilə birlikdə yollanıb.