İrakli Ğaribaşvili UNDP daimi nümayəndəsi Nik Beresford ilə görüşüb

Gürcüstanın Baş naziri İrakli Ğaribaşvili Birləşmiş Millətlər Təşkilatının İnkişaf Proqramının (UNDP) Gürcüstandakı daimi nümayəndəsi Nik Beresford ilə görüşüb. Məlumatı hökumət administrasiyasının mətbuat xidməti yayıb.

Onların sözlərinə görə, Hökumət Administrasiyasında keçirilən görüşdə Gürcüstan və UNDP arasında səmərəli əməkdaşlığın daha da dərinləşdirilməsi və möhkəmləndirilməsi müzakirə olunub. UNDP-in Gürcüstanda demokratik proseslərin gücləndirilməsi, iqtisadi inkişaf, ətraf mühitin mühafizəsi və böhranın qarşısının alınmasına mühüm töhfəsi qeyd edilib. COVID-19 ilə mübarizədə BMT-nin İnkişaf Proqramının dəstəyinin vacibliyi də vurğulanıb.

Görüşdə Dayanıqlı İnkişaf Məqsədlərinə nail olmaq prosesində UNDP ilə əməkdaşlıq müzakirə olunub. Gürcüstanın 2030-cu ilədək Davamlı İnkişaf Gündəliyinin həyata keçirilməsi istiqamətində səyləri və bu prosesdə BMT-nin yeni İnkişaf Sənədinin əhəmiyyəti qeyd edilib.

Söhbət zamanı BMT-nin İnkişaf Proqramının Gürcüstanda insan hüquqları mexanizminin gücləndirilməsində mühüm töhfəsi müzakirə olunub. İrakli Ğaribaşvili qeyd edib ki, hökumət geniş hüquq spektrini əhatə edən və insan hüquqları sahəsində beynəlxalq tərəqqiyə cavab verən ikinci insan hüquqları strategiyası üzərində işləyir. Nik Beresford Gürcüstanda insan hüquqlarının müdafiəsi istiqamətində atılan müsbət addımları vurğuladı.

Söhbət zamanı Gürcüstanın işğal olunmuş ərazilərindəki vəziyyətə və Gürcüstan hökumətinin münaqişənin sülh yolu ilə həlli istiqamətində apardığı siyasətə diqqət yetirilib. UNDP-in Gürcüstanın işğal olunmuş rayonlarında həyata keçirdiyi humanitar layihələr də vurğulanıb və Baş nazir buna görə BMT İnkişaf Proqramının rezident nümayəndəsinə təşəkkür edib.