Gürcüstanın baş naziri İrakli Ğaribaşvili Macarıstanın Gürcüstandakı fövqəladə və səlahiyyətli səfiri Ana Maria Şiko ilə görüşüb.

Baş nazirin mətbuat xidmətindən verilən məlumata görə, tanışlıq xarakteri daşıyan görüşündə baş nazir macar diplomatı yeni vəzifəyə təyin olunması münasibətilə təbrik edib və məhsuldar əməkdaşlığa ümid etdiyini bildirib.

Tərəflər Gürcüstan və Macarıstan arasında uğurlu əməkdaşlığın daha da inkişaf etdirilməsi perspektivlərini müzakirə ediblər. Ticarət-iqtisadi əlaqələr, turizm, nəqliyyat və təhsil xüsusilə qeyd edilib.

Macarıstan tərəfi Gürcüstanın suverenliyi və ərazi bütövlüyünə, eləcə də Avropa və Avro-Atlantik inteqrasiya prosesinə sarsılmaz dəstəyini bir daha təsdiqləyib.

Hökumət başçısı qeyd edib ki, ölkə Gürcüstanın Aİ-yə üzvlük müraciətinə baxılması prosesində beynəlxalq tərəfdaşların, o cümlədən Macarıstanın güclü dəstəyinə ümid edir. Bununla yanaşı, baş nazirin sözlərinə görə, Gürcüstan Macarıstanın Avropa İttifaqının Monitorinq Missiyasına (EUMM) əhəmiyyətli töhfəsini yüksək qiymətləndirir.

Məlumatı Gürcüstanın baş nazirinin mətbuat xidməti yayır.