Gürcüstan hökumət başçısının İsrail dövlətinə səfəri İsrail dövlətinin baş naziri ilə görüşlə başladı. Gürcüstanın baş nazirinin mətbuat xidmətinin məlumatına görə, İrakli Ğaribaşvili və Naftali Bennett iki ölkə arasında əməkdaşlıq gündəliyinin mühüm məsələlərini müzakirə ediblər.

İsrail dövlətinin baş naziri İrakli Ğaribaşviliyə ikinci rəsmi səfərinə görə təşəkkür edib.

“Heç kimə sirr deyil ki, biz bir-birimizə çox dəyər veririk. Bizə ikinci dəfə rəsmi səfər etməyinizi yüksək qiymətləndiririk” – deyə Naftali Bennett bildirib.

İrakli Ğaribaşvili qonaqpərvərliyə görə İsrail dövlətinin baş nazirinə təşəkkür edib.

“Baş nazir, ilk növbədə, qəbulunuza görə təşəkkür edirəm. Burada olmaq bizim üçün böyük şərəfdir. Biz yaxın dostuq və bu dostluq 26 əsrdən çoxdur ki, mövcuddur. Sizə bir daha təşəkkür edirəm” – deyə İrakli Ğaribaşvili bildirib.