“Gürcü arzusu”nun seçkilərdə qalib gəlməsinə söz yoxdur, amma məsələ ondadır ki, biz bu seçkilərdə güclü, inandırıcı şəkildə qalib gələrək konstitusiya çoxluğu əldə etməliyik”, – bu barədə “Gürcü arzusu”nun sədri İrakli Ğaribaşvili Batumidə partiya fəalları ilə görüş keçirdiyi vaxt  jurnalistlərə müsahibəsində bildirib.

Onun sözlərinə görə, partiya təşkilatının nümayəndələri ilə görüşdə seçki kampaniyasının başlanması ilə bağlı müzakirələr aparılıb.

“Bu gün bölgələrdə görüşlərə başladıq. İlk görüşü Acarada keçirdim. İki həftə əvvəl 100 gün ərzində on rayonda partiya tədbirləri keçirəcəyimi bildirdim və ilk görüşü Acarada başladıq. Bu gün partiya təşkilatının nümayəndələri, rəhbərləri, partiyamızın aktivləri ilə görüşdüm. Biz seçki kampaniyasının başlamasından danışdıq. Təbii ki, bizim üçün əsas vəzifə bu seçkilərdə güclü qələbə qazanmaqdır. Bu seçkidə “Gürcü arzusu”nun qalib gələcəyinə söz yoxdur, amma məsələ ondadır ki, biz bu seçkidə güclü və inandırıcı şəkildə qalib gələrək konstitusiya çoxluğu əldə etməliyik. Bu, mənim partiyamıza verdiyim əsas mesaj idi və bu, əlbəttə ki, çox gözəl hissdir. Biz indi hər yerdə, bütün bölgələrdə maksimum səfərbərlik etməliyik və mənim səfərlərim, bölgələrdə keçirdiyim görüşlər buna xidmət edir”, – deyə İrakli Ğaribaşvili bildirib.