Gürcüstanın Baş naziri İrakli Ğaribaşvilinin sözlərinə görə, onun Çinə səfəri zamanı təhsil sahəsində mühüm sənəd imzalanıb.

Ğaribaşvilinin Pekin Dil və Mədəniyyət Universitetində Şota Rustavelinin büstünün açılış mərasimində çıxışı zamanı dediyi kimi, Çin və Gürcüstan arasında Gürcüstanın ibtidai və orta məktəblərində Çin dilinin birgə tədrisinə dair memorandum imzalanıb.

“Səfərimiz zamanı biz təhsil sahəsində mühüm sənədi – Gürcüstanın ibtidai və orta məktəblərində Çin dilinin birgə tədrisinə dair anlaşma memorandumunu imzalamaqdan məmnunuq. İnanıram ki, bu, xalqlarımız arasında qarşılıqlı anlaşmanı dərinləşdirmək məqsədimizə böyük töhfə verəcək. Mən bir daha Prezident Si Dzinpinə və onun hökumətinə, Pekin Dil və Mədəniyyət Universitetinin nümayəndələrinə Şota Rustavelinin dünya ədəbiyyatına verdiyi töhfələrə və irsimizi işıqlandırmaq üçün bu gözəl fürsətə görə səmimi təşəkkürümü bildirirəm. Ümid edirəm ki, bu büst bu universitetin tələbələri və professorları üçün bir ilham olacaq və onları gürcü ədəbiyyatının, poeziyasının və bənzərsiz dilimizin geniş dünyasını kəşf etməyə təşviq edəcəkdir. Qoy bu büst dostluq və qarşılıqlı hörmət rəmzi kimi möhkəm dayansın, bizi daha parlaq və bir-birinə bağlı gələcəyə aparan motivasiya olsun. Çox sağ olun”, – deyə baş nazir bildirib.