Mən sizin səfərinizə şadam, cənab Prezident, biz tez-tez səfərlərin təşkili ənənəsini uğurla davam etdiririk, mən bir neçə ay əvvəl Azərbaycanda olmuşam, eləcə də siz keçən il Gürcüstanda olmusunuz və şadam ki, tez-tez belə səfərlər həyata keçirilir və mən buna görə çox minnətdaram, – bu haqda Gürcüstanın baş naziri İrakli Qaribaşvili Azərbaycan Prezidenti İlham Əliyevlə birgə keçirdiyi brifinqdə deyib.

Qaribaşvilinin sözlərinə görə, onun növbəti səfəri Azərbaycana olacaq.

“Növbəti səfər yəqin ki, bir neçə aydan sonra mənim tərəfimdən olacaq. Səmərəli, xoş görüş oldu, aramızda strateji əməkdaşlıq məsələləri müzakirə olundu, Azərbaycan Gürcüstanın strateji tərəfdaşıdır, görkəmli dost dövlətdir, bizi çoxəsrlik mehriban qonşuluq və dostluq münasibətləri bağlayır. Xalqlarımız arasında bu dostluq davam edir və bu dostluğun, qardaşlığın möhkəmlənməsində cənab İlhamın çox böyük töhfəsi var”, – Qaribaşvili bildirib.

Azərbaycan Respublikasının Prezidenti İlham Əliyev bu gün Gürcüstanda işgüzar səfərdədir.