İqtisadiyyatın gücləndirilməsi və regional mərkəzin inkişafı düzgün planlaşdırma və qətiyyətli demokratik sadiqlik olmadan mümkün olmayacaq, məhz bu səbəbdən keçən il “Hökumətin baxışı 2030”u təsdiqlədik” – bu barədə Gürcüstanın Baş naziri İrakli Ğaribaşvili Dubayda Dünya Hökumətlər zirvə toplantısında çıxışı zamanı açıqlayıb.

“Hökumətin Baxışı 2030″ Gürcüstanın inkişaf strategiyası və hərtərəfli milli siyasət sənədidir, ölkə siyasətinin planlaşdırılması və koordinasiyasına rəhbərlik edir. Sənəd, həmçinin ölkənin 2030-cu il üçün inkişafının əsas hədəf və prioritetlərini, Birləşmiş Millətlər Təşkilatının 2030-cu il üçün müəyyən etdiyi davamlı inkişaf ruhunu, Gürcüstanın Avropa İttifaqı ilə Assosiasiya Sazişinin prinsiplərini əks etdirir. Strategiyanın uzunmüddətli baxışı Gürcüstanda davamlı iqtisadi artımı, sosial bərabərliyi, təhlükəsizlik və sabitliyi, demokratiyanı və qanunun aliliyini təşviq etmək məqsədini hədəfləyir. Qətiyyətli addımlar atarkən Gürcüstan hökuməti öz işinin şəffaflığını və açıqlığını qoruyur. O, açıq idarəçilikdə və korrupsiyaya qarşı mübarizədə, eləcə də təhlükəsizlik sahəsində yüksək standartlar ortaya qoyur. Bu səy bir çox beynəlxalq reytinqlərdə, o cümlədən 2022-ci il üzrə Beynəlxalq Şəffaflığın Korrupsiya Qavrama İndeksində öz əksini tapıb və bu indeks əsasında Gürcüstan dünyanın 180 ölkəsi arasında 41-ci yeri tutur” -bu barədə Gürcüstanın Baş naziri açıqlayıb.

İrakli Ğaribaşvili Gürcüstanın Dünya Bankının 2021-ci il üzrə idarəetmə göstəricilərinə görə bir çox Aİ və NATO üzvü olan ölkələri qabaqladığını bildirib. O, Gürcüstanın tənzimləmə keyfiyyətinə görə 35-ci yerdə qərarlaşdığını qeyd edib.

“Qlobal miqyasda, 2022-ci ilin qanunun aliliyi üzrə indeksə əsasən Gürcüstan Şərqi Avropa və Mərkəzi Asiya regionunda birinci yerdədir. 2022-ci ildə cinayətkarlığın səviyyəsinə görə dünyanın ən təhlükəsiz ölkələri arasında Gürcüstanın dünyada 18-ci, Avropada isə səkkizinci yeri tutması heç də az əhəmiyyət kəsb etmir. Əldə etdiyimiz bütün bu irəliləyişləri nəzərə alaraq, Gürcüstan bu gün hər zamankindən daha çox Avropa İttifaqına və NATO-ya üzv olmağa can atır” – deyə Baş nazir açıqlayıb.

Gürcüstan hökumətinin başçısının qeyd etdiyi kimi, Gürcüstanın gələcəyi Avropa İttifaqındadır.

“Bildiyiniz kimi, 2022-ci ilin martın 3-də Gürcüstan gürcü xalqının uzunmüddətli seçiminə konkret cavab olaraq Avropa İttifaqına daxil olmaq üçün müraciət təqdim edib. 2022-ci ilin iyunun 23-də isə Avropa Şurası Gürcüstanın Avropa perspektivini tanıdı və bu, Gürcüstanın gələcəyinin Avropa İttifaqında olduğunu bir daha təsdiq etdi. Qarşıda həlledici yolumuz, Avropa İttifaqına daxil olmaq var və namizəd statusu növbəti mərhələmizdir. Ümid edirik ki, Gürcüstanın tərəqqisi və Şərq Tərəfdaşlığı ölkələri arasında liderliyi bu nailiyyəti qeyd edəcəkdir. Yuxarıda deyilənlərin hamısı onu göstərir ki, Gürcüstan ətrafındakı mühitin daim dəyişməsinə baxmayaraq, Gürcüstan hökuməti yeni regional, qlobal, sosial, iqtisadi və siyasi hadisələrə çevikdir və reaksiya verir.

Sonda vurğulamaq istərdim ki, bizim Gürcüstana münasibətdə baxışımız sabitliyin, imkanların və inkişafın simvoluna çevrilməyi nəzərdə tutur. Biz bütün vətəndaşlarımıza fayda verən güclü, dinamik iqtisadiyyat yaratmağa sadiqik. Eyni zamanda, biz inklüziv, innovativ və gələcəyə yönümlü cəmiyyət qururuq. Gələcək üçün yadda saxlamalıyıq ki,- məqsədimiz Gürcüstanı ümumi xalq birliyiylə ümumi baxışa nail olmağın mümkünlüyünün bariz nümunəsinə çevirməkdir. Bu, Birləşmiş Ərəb Əmirliklərinin heyrətamiz inkişafından ilhamlanır. Uğur qazanmaq üçün resurslarımız, istedadımız və həvəsimiz var. Əminəm ki, bir yerdə olmaqla biz öz baxışımızı reallaşdıracağıq”- deyə İrakli Ğaribaşvili açıqlayıb.