Gürcüstanın Baş naziri İrakli Ğaribaşvili Avropa İttifaqının Gürcüstandakı Monitorinq Missiyasının (EUMM) rəhbəri Marek Şçiqellə görüşüb.

Baş nazirin mətbuat xidmətindən verilən məlumatda vida görüşündə Aİ-nin Monitorinq Missiyasının fəaliyyətinə toxunulduğu bildirilir. Hökumət başçısı Marek Şçiqelə missiyanın effektiv fəaliyyətinə və görülən işlərə görə təşəkkür edib.

“Aİ-nin Monitorinq Missiyasının işğal xətti boyunca gərginliyin artmasının qarşısını aldığı və bölgədə təhlükəsizliyin təmin edilməsini təşviq etdiyi qeyd olunub.

EUMM-un bölgədə monitorinq mandatı ilə təchiz edilmiş yeganə beynəlxalq missiya olduğu vurğulanıb.

Avropa İttifaqının digər dəyərli alətləri ilə yanaşı, monitorinq missiyasının Gürcüstanda olmasının 2008-ci ildə Rusiya-Gürcüstan müharibəsinin nəticələrinin aradan qaldırılmasında və münaqişənin sülh yolu ilə tənzimlənməsi məsələsində Avropa İttifaqının önəmli rolunu əyani şəkildə əks etdirdiyi qeyd olunub” – deyə Baş nazirin mətbuat xidmətinin məlumatında qeyd edilib.

Hökumət Administrasiyasında keçirilən görüşdə Avropa İttifaqının Monitorinq Missiyasının siyasi müşaviri Corc Sand iştirak edib.