Gürcüstan bu gün Avropa İttifaqına və NATO-ya əvvəlkindən daha yaxındır-bu sözləri Gürcüstan Parlamentinin Müdafiə və Təhlükəsizlik Komitəsinin sədri İrakli Beraia deyib.

Onun sözlərinə görə, Gürcüstanın Avro-Atlantik məkana inteqrasiyası birinci məsələdir.

“Biz açıq şəkildə demişik və həmişə təkrar edirik ki, iki qırmızı xətt var, iki məsələ var ki, biz hakim güc olaraq heç vaxt güzəştə getməyəcəyik. Bu, Gürcüstanın suverenliyi və ərazi bütövlüyü, Gürcüstanın Avropa və Avro-Atlantik inteqrasiyasıdır. Bəli, “Gürcü Arzusu” hökuməti Gürcüstanın Avropa və Avro-Atlantik inteqrasiya yolunda irəlilədiyi hökumətdir. Biz həm NATO, həm də Aİ-yə inteqrasiya prosesində bizə kömək edən mühüm praktiki alətlər əldə etmişik. “Gürcü Arzusu” hökuməti assosiasiya sazişini imzalayan, Avropa İttifaqından vizasız gediş-gəliş əldə edən, Avropa İttifaqı ilə əməkdaşlığını günü-gündən dərinləşdirən və intensiv şəkildə Avropaya doğru irəliləməsini təmin edən hökumətdir. NATO-ya gəlincə, Gürcüstan məhz “Gürcü Arzusu” hökuməti altında NATO-Gürcüstan əsas paketini, gücləndirilmiş imkanları və tərəfdaş statusunu aldı. Gürcüstan NATO-ya daxil olmaq üçün bütün praktiki alətlərə malikdir, bizim alyansla əməkdaşlığımız görünməmiş yüksək səviyyədədir. Bizim vəzifəmiz tərəfdaşlarımızla birlikdə 2008-ci ilin Buxarest Sammitində Gürcüstanın NATO-ya üzv olması ilə bağlı qəbul edilmiş qərarların ağlabatan müddət ərzində yerinə yetirilməsini təmin etməkdir” – deyə İrakli Beraia jurnalistlərə açıqlamasında deyib.