Gürcüstanın xarici işlər naziri İlia Darçiaşvili isveçli həmkarı ilə görüşüb. İlia Darçiaşvili görüşdən sonra jurnalistlərə xarici işlər nazirindən sarsılmaz və güclü dəstək mesajları aldığını açıqlayıb.

Bununla yanaşı, İlia Darçiaşvilinin qeyd etdiyi kimi, gələn ildən İsveç Avropa İttifaqı Şurasına sədrlik edəcək ölkə olacaq və o, bu müddət ərzində Gürcüstanın Avropaya inteqrasiya istiqamətində konkret nəticələri olacağına əmin olduğunu bildirib.

“İsveçin yeni təyin olunmuş xarici işlər naziri ilə görüşmək imkanım oldu. Gələn ildən, ilin birinci yarısında İsveçin Avropa İttifaqı Şurasına sədrlik etməsi çox vacibdir. İsveçin bu istiqamətdə də aktiv dəstəyi bizim üçün vacib olacaq, çünki biz bir tərəfdən Avropa İttifaqının bizə verdiyi 12 tövsiyəni yerinə yetirmək, digər tərəfdən isə namizəd statusunu qısa müddətdə almaq prosesindəyik. Birmənalı olaraq qeyd etmək istərdim ki, biz İsveçin xarici işlər nazirindən sarsılmaz və güclü dəstək mesajları almışıq. Əminəm ki, onların sədrliyi dövründə Gürcüstanın Avropaya inteqrasiya istiqamətində konkret nəticələri olacaq”-deyə İlia Darçiaşvili açıqlayıb.