Gürcüstan hökumətinin başçısı İrakli Ğaribaşvilinin İordaniya Haşimilər Krallığına səfəri çərçivəsində Gürcüstanın xarici işlər naziri İlia Darçiaşvili iordaniyalı həmkarı və vitse baş nazir Aiman əl-Səfədi ilə görüşüb.

Gürcüstan Xarici İşlər Nazirliyindən verilən məlumata görə, görüşdə tərəflər iki ölkə arasında mövcud ikitərəfli əməkdaşlıq və onun müxtəlif sahələrdə möhkəmləndirilməsi və dərinləşdirilməsi yollarını müzakirə ediblər.

Gürcüstan və İordaniya arasında iqtisadi əlaqələrin intensivləşdirilməsinin vacibliyinə, ticarət və turizmin inkişafına, eləcə də birgə müəssisələrin yaradılması imkanlarına xüsusi diqqət yetirilib. Həmçinin Hökumətlərarası İqtisadi Komissiyanın növbəti raundunun keçirilməsinə, eləcə də iki ölkə arasında ikitərəfli hüquqi bazanın genişləndirilməsinə toxunulub. Bu kontekstdə yüksək səviyyəli səfərlərin zəruriliyi xüsusilə vurğulanıb və yaxın gələcək üçün siyasi məsləhətləşmələrin keçirilməsi planlaşdırılıb.

Bundan əlavə, nazirlər iki ölkə arasında vizasız rejimin əhəmiyyətindən danışıblar ki, bu da həm turist, həm də möminlərin ziyarətlərinin sayını artırmağa kömək edəcək, xalqlar arasında fərqindəliyin artırılmasına və yaxınlaşmaya daha çox təkan verəcək. Bu baxımdan, nazirlər Gürcüstan və İordaniya arasında vizasız rejimi alqışlayıblar. Gürcüstanın xarici işlər naziri həmkarına Gürcüstanın ərazi bütövlüyü və suverenliyinə göstərdiyi sarsılmaz dəstəyə, həmçinin İordan çayı yaxınlığında torpaq sahəsinin verilməsinə görə təşəkkür edib və onu Gürcüstana səfər etməyə dəvət edib.

Məlumatı Gürcüstan Xarici İşlər Nazirliyi yayır.