Həm ənənəvi, həm də bərpa olunan enerji mənbələri ilə zəngin olan Azərbaycan gələcəkdə də Avropanın mühüm tərəfdaşı olmaqda davam edəcək. Bu barədə Azərbaycan Prezidenti İlham Əliyev Berlində Almaniya kansleri ilə görüşündə bildirib.

Əliyev Azərbaycan ilə Avropa İttifaqı arasında enerji sahəsində əməkdaşlıqdan danışıb.

“Avropada yeni mənbələrdən təbii qaza tələbat artır. Əgər 2021-ci ildə biz Avropa İttifaqı ölkələrinə səkkiz milyard kubmetr qaz vermişiksə, bu il bu rəqəm 12 milyarda çatıb. Biz bu məsələdə Avropa ölkələrinə dəstək olmaq üçün əlavə investisiyalar yatırırıq və əlavə vəsait ayırırıq. Beləliklə, həm ənənəvi, həm də bərpa olunan enerji mənbələri ilə zəngin olan Azərbaycan gələcəkdə Avropanın mühüm tərəfdaşı olacaq”, – deyə Əliyev bildirib.

Azərbaycan liderinin sözlərinə görə, 2027-ci ilə qədər Azərbaycanda doqquz günəş və külək elektrik stansiyasının fəaliyyəti planlaşdırılır, 2030-cu ilə qədər isə daha 10 elektrik stansiyası tikiləcək.

“Hazırda biz yaşıl enerjinin Avropaya ixracı üzərində fəal işləyirik. İnanıram ki, təbii qaz tədarükçüsü olan Azərbaycan da Avropanın yaşıl enerji tədarükçüsünə çevriləcək”, – deyə İlham Əliyev bildirib.

Regional təhlükəsizlik məsələsinə gəlincə, Əliyevin sözlərinə görə, Bakı Azərbaycan və Ermənistan arasında davam edən sülh danışıqlarını yüksək qiymətləndirir.

“Bu gün Ermənistanla Azərbaycan arasında davam edən proses nəticəsində sərhədlərin delimitasiyası və demarkasiyasına başlanılıb. 1990 və 1992-ci illərdə işğal olunmuş 4 Azərbaycan kəndi bizə qaytarıldı. Onu da deyim ki, Azərbaycandakı Rusiya-Türkiyə birgə monitorinq mərkəzi bu gün səhər saatlarında fəaliyyətini dayandırıb. Buna artıq ehtiyac yoxdur. Buna görə də sülhə nail olmaq üçün çox yaxşı imkanlar var. Bu məsələdə bizə kömək etmək istəyən ölkələrlə əməkdaşlığa hazırıq. Ümid edirik ki, yaxın vaxtlarda bu istiqamətdə müsbət addımlar atılacaq. Biz Almaniyanın bu sahədə dəstəyini qiymətləndiririk və buna görə minnətdarıq”, – deyə Azərbaycan lideri bildirib.