NATO-nun baş katibi İens Stoltenberqin sözlərinə görə, Qara dəniz regionunda pisləşən təhlükəsizlik vəziyyəti Gürcüstan və Ukrayna müdafiə nazirləri tərəfindən NATO Nazirlər Şurası çərçivəsində üzv ölkələrin müdafiə nazirləri ilə görüş zamanı müzakirə olunacaq.

“NATO-nun müttəfiqləri hər iki ölkənin suverenliyi və ərazi bütövlüyünə güclü dəstəyini bir daha təsdiq edəcəklər”, – deyə Stoltenberq bildirib.

Stoltenberq qeyd edir ki, NATO Gürcüstanla əməkdaşlığı gücləndirib.

“Biz müxtəlif istiqamətlərdə əməkdaşlığı gücləndirmişik. Bizim birgə fəaliyyətimiz, təlimlərimiz var və NATO ilə Gürcüstanın necə sıx əməkdaşlıq etdiyini göstərən başqa vasitələr də var.

Biz islahatları və Gürcüstanın ərazi bütövlüyünü və suverenliyini dəstəkləməyə davam edirik. Bu, Gürcüstan və NATO arasında müntəzəm və vacib koordinasiyanın bir hissəsidir”, – NATO-nun baş katibi deyib.

2022-ci il NATO sammitində Gürcüstan və Ukrayna arasında yüksək səviyyəli görüş məsələsinə gəlincə, Stoltenberq bu barədə danışmaq üçün hələ tez olduğunu bildirib.