Ukraynada müharibənin başa çatması ilə Rusiyanın təcavüz dairəsi qırılmalıdır-bu barədə NATO-nun baş katibi İens Stoltenberq “Reuters” agentliyinə müsahibəsində açıqlayıb.

O, Rusiyaya Avropanın təhlükəsizliyini pozmağa imkan verilməməli olduğunu açıqlayıb.

“Biz müharibənin nə vaxt bitəcəyini bilmirik, lakin bilirik ki, bu müharibə bitəndə tarixin təkrarlanmamasını təmin etməlidir. Bu, nümunənin bir hissəsidir: 2008-ci ildə Gürcüstan, 2014-cü ildə Donbass, Krım, sonra isə keçən il tam miqyaslı müdaxilə. Biz elə etməliyik ki, Rusiyanın təcavüz dairəsi qırılsın. Biz Rusiyanın Avropanın təhlükəsizliyini pozmasına imkan verməməliyik. Müvafiq olaraq Ukraynanın təcavüzü dayandırması üçün hərbi imkanlara, gücə malik olmasını təmin etməliyik, eləcə də Rusiyanın bu müharibə başa çatdıqdan sonra yenidən hücuma keçməməsi üçün mexanizmlər tapmalıyıq” -deyə İens Stoltenberq bildirib.

NATO baş katibi Ukrayna və Rusiyanın müharibədə bərabərhüquqlu tərəflər olmadığını, çünki birinin təcavüzkar, digərinin isə qurban olduğunu qeyd edib.

“Prezident Putin və Rusiya döyüşü dayandırsalar, müharibə bitəcək və sülh olacaq. Prezident Zelenski və Ukrayna döyüşü dayandırsalar, Ukrayna suveren, müstəqil ölkə kimi mövcud olmağı dayandıracaq. Beləliklə, bunlar iki bərabər tərəf deyil – bu, təcavüzkar və təcavüzün qurbanıdır”- deyə İens Stoltenberq açıqlayıb.