Hindistanın baş naziri Narendra Modi Rusiya ilə Ukrayna arasında vasitəçilik etməyə hazır olduğunu bildirib. Hindistan hökumətinin başçısı bu barədə Varşavada Polşanın baş naziri ilə görüşündə bildirib.

“Biz dialoq və diplomatiyanı, sülhü və sabitliyi mümkün qədər tez bərpa etməyi dəstəkləyirik. Hindistan dost ölkələrlə birlikdə buna töhfə verməyə hazırdır”, – Narendra Modi bildirib.

Onun dediyinə görə, Hindistan qəti şəkildə inanır ki, heç bir problem döyüş meydanında həll oluna bilməz.

Digər tərəfdən, Polşanın baş naziri Donald Tuskun bəyanatına görə, “Hindistanın baş naziri müharibənin dinc, ədalətli və tez bir zamanda sona çatması üçün şəxsən işləməyə hazır olduğunu təsdiqləyib”.

“Biz əminik ki, Hindistan bu işdə çox mühüm rol oynaya bilər”, – Tusk bildirib.

Bununla yanaşı, Polşanın baş naziri Ukraynanın öz sərhədlərini qorumaq hüququndan danışıb.

“Tarix xalqlarımıza qaydalara hörmət etməyin və sərhədləri, ərazi bütövlüyünü qorumağın nə qədər vacib olduğunu öyrətdi”, – Polşa hökumətinin başçısı bildirib.

Məlumat üçün bildirək ki, Hindistanın baş naziri Narendra Modi Ukrayna səfərindən əvvəl Polşaya səfər edib. Narendra Modi avqustun 23-də Ukraynaya səfər etməyi planlaşdırır. Bu, Hindistan liderinin son 30 ildə Ukraynaya ilk səfəri olacaq. Bundan əvvəl, bir neçə həftə əvvəl Hindistanın baş naziri Moskvada olub və orada Vladimir Putinlə görüşüb. Ukrayna prezidenti Narendra Modinin Rusiyaya səfərini “məyusedici” olaraq qiymətləndirib.