Gürcüstan Daxili İşlər Nazirliyi tərəfindən Avropa ölkələrinə ezamiyyat olunmuş polis attaşeləri uğurlu fəaliyyətlərinə görə mükafatlandırıldılar. Bu barədə Gürcüstanın Daxili İşlər Nazirliyi məlumat yayır.

Gürcüstan Daxili İşlər Nazirliyinin polis attaşesi, polkovnik Giorgi Qamsaxurdiya Polşa polisi qarşısında xüsusi xidmətlərinə görə, Polşa Respublikasının Daxili İşlər naziri, Mariuş Kaminski tərəfindən qızıl medalla təltif edildi. Qamsaxurdiyaya qeyd olunan mükafatı Polşa polisinin baş komendantı, general Yaroslav Şimçik təqdim etdi. Mükafatlandırma mərasimi Baş Polis Komandanlığının binasında keçirildi.

Gürcüstanın polis attaşesi Şalva Şubladze isə, “Qırmızı Xaç” medalı ilə təltif edildi. Gürcüstan Daxili İşlər Nazirliyinin məlumatına görə, indiyədək İspaniyada əcnəbi polis attaşesinin sözügedən tipli və yüksək rütbəli medalla təltif edilməsi faktı olmayıb. Şalva Şubladze mövcud uğurlu beynəlxalq polis əməkdaşlığı nəzərə alınaraq, İspaniyanın Daxili İşlər naziri, Fernando Qrande Marlaskanın əmri ilə “Qırmızı Xaç” medalı ilə təltif edildi.